अनलाइन कक्षाबाट बालबालिकाको आँखामा गम्भीर समस्या आउन सक्ने दृष्टि विशेषज्ञहरुले चेतावनी

  • 22
    Shares

काठमाण्डाै – विद्यालयहरुले सञ्चालन गरेका अनलाइन कक्षाबाट बालबालिकाको आँखामा गम्भीर समस्या आउन सक्ने दृष्टि विशेषज्ञहरुले चेतावनी दिएका छन् । दृष्टि विशेषज्ञ सङ्घका प्रवक्ता दीपककुमार शाहले स–साना बालबालिकाले समेत लामो समयसम्म डिजिटल स्क्रिनमा हेर्दा आँखामा तत्कालीन र दीर्घकालीन असर देखिने बताउनुभयो ।

अहिले विद्यार्थीहरु अनलाइन कक्षा, अनलाइन होमवर्क, थप टेलिभिजन र अरु प्रयोजनका लागि मोबाइल, ल्यापटप चलाउँदा औसतका आठ घण्टाभन्दा बढी स्क्रिनमा हेर्ने भएकोले यो आँखाका लागि घातक भएको उहाँले बताउनुभयो ।

दृष्टि विशेषज्ञ शाहले लामो समय स्क्रिनमा हेर्दा तत्काल आँखा पोल्ने, बिझाउने, हेर्न कठिन हुने, आँखा सुख्खा हुने जस्ता समस्या देखिने र दीर्घकालीन असरका रुपमा दूर दृष्टि दोषसँगै दृष्टि गुम्नेसम्मको जोखिम रहने बताउनुभयो ।

सरकारले अनलाइन कक्षालाई अनुमति दिएको र कोरोना महामारीका कारण यो बाध्यता समेत भएकोले बालबालिकाको आँखा स्वास्थ्यलाई ध्यान दिएर अनलाइन कक्षा सञ्चालन गर्न उहाँले आग्रह गर्नुभयो ।

उहाँले अनलाइन कक्षा सञ्चालन गर्दा एक कक्षाभन्दा मूनिका बालबालिकालाई ३० मिनेटभन्दा कमको एउटा कक्षा, कक्षा एकदेखि आठसम्मका लागि ४५ मिनेट अवधिका दुई वटा कक्षा र कक्षा नौदेखि १२ सम्मका बालबालिकालाई ४५ मिनेट दरका चार वटा कक्षा सञ्चालन गर्न सकिने उहाँले बताउनुभयो ।

यस्तै कक्षा १२ भन्दा माथिका बालबालिकालाई ४५ मिनेट दरका बढीमा चार वटा कक्षा सञ्चालन गर्न सकिने दृष्टि विशेषज्ञ शाहले बताउनुभयो । उहाँले अनलाइन कक्षा लिँदा उज्यालो र हावा ओहोर दोहोर हुने कोठामा बस्नुपर्ने, हरेक २० मिनेटमा उठेर २० सेकेण्डसम्म २० मिटर पर हेर्नुपर्ने, प्रशस्त पानी पिउने, आँखाको व्यायाम गर्ने जस्ता काम गर्नुपर्ने बताउनुभयो ।

बजारमा आँखा जोगाउने चस्मा बेच्ने गरेको भए पनि त्यसको प्रभावकारिता पुष्टि भइनसकेकोले सकेसम्म कम समय स्क्रिनमा बिताउनु उत्तम हुने उहाँले बताउनुभयो ।

Total Page Visits: 82 - Today Page Visits: 1

यो खबर पढेर तपाईलाई कस्तो महसुस भयो ?

Loading spinner

You May Also Like

Leave a Reply

Your email address will not be published. Required fields are marked *